Korleis utviklar kollektivtrafikken seg i bergensområdet? Takk vere automatisk passasjertelling har vi gode tal for både buss og bane i området som er dekka av byvekstavtalen.

Ser vi overordna på det har veksten i byvekstavtaleområdet i og rundt Bergen vore sterk i ei årrekkje. Dette har vore drive delvis av opninga av nye bybanetraséar. Bybanen utgjer med 26,3 millionar påstigande også ei ryggrad i heile kollektivsystemet.

Samstundes skal vi ikkje gløyme at fleirtalet av dei kollektivreisande er bussreisande. Suksessformelen for eit velfungerande kollektivsystem ligg i samvirket mellom ulike transporttilbod. I 2025 vart det bussane som hadde flest nye påstigande i absolutte tal, med kring 850.000 fleire påstigingar i løpet av 2025 enn året før.

Sterkast var denne veksten på nokre av hovudlinjene i Bergen, og på regionstamlinja mellom Os og Bergen.

Det er også betydeleg vekst på Bybanens linje 2. På linje 1 var veksten på si side på berre 0,1 prosent. Ei forklaring kan vera at reisande i Årstad bydel som kan velje mellom dei to linjene i større grad har byrja å velja linje 2. På denne er det framleis god kapasitet, også i rush, medan linje 1 tidvis kan vere prega av trengsel.

Tala over inkluderer også fleire avviksperioder. I januar hadde linje 1 to dagar med driftsstans, som eit resultat av uvanleg store snømengder og vanskar med rydding av sporet. Sommaren 2025 var haldeplassane i Bergen sentrum stengte for begge bybanelinjene grunna vedlikehaldsarbeid. Ei periode var også haldeplassane Nygård, Florida og Danmarks plass ute av drift. Dette har påverka reisetal, og har også ført til utfordringar med den automatiske passasjerteljinga. Det siste er dekka opp gjennom å inkludere eit nedre estimat på tal påstigande som manglar i teljinga i tala for juli. Dei reelle påstigingstala er truleg noko høgare.

Vedlikehaldsarbeid får konsekvensar

Ser ein vekk frå dei nemnde avviksperiodene, er veksten på Bybanen noko høgare enn tala på årsnivå viser.

Samstundes har Bybanen no ein alder som gjer at vedlikehaldsbehovet på infrastruktur vil auke noko, og vi kan vente nye periodar med avvikskøyring som kan påverke trafikk og reisetal.

Vedlikehaldsarbeid påverka også fleire av dei største busslinjene i Bergen i løpet av 2025. Stengingane av Kalvedalsvegen og Michael Krohns gate har hatt negativ påverknad på dei mykje brukte linjene 5, 6 og 20. Samanlikna med 2024 mista desse tre linjene over 200.000 påstigingar i tredje kvartal.